風雲

財經演員

2009-12-11

恆指係23,000點出現強大阻力，每到23,000點都會出現一千至千五點調整。十二月份大家都等放聖誕假、新年假，芬佬今年又大豐收無須要同你搏命，估計2009年餘下時間會係21000點 – 23000點上落，要搵食要留意各大投行及資金進入板塊，炒野最緊要鬥快，零晨時份發現大摩同『碎銀』加注馬鋼 (323)，今早已急升7%，馬鋼 (323)昨日跌市下仍然逆市上升，鋼鐵類同胞首長國際 (697)、鞍鋼 (347)同樣大升7%，大戶重注下廚段估都要炒幾日，無三、四成利潤好難同班大客交代。

烈火戰車吉利 (175)、東風 (489)狂飆幾個月昨日遇上交通意外，吉利 (175) 企圖衝擊5元大關，阿爺的汽車優惠政策未能滿足大鱷餵口，借勢掟落4蚊邊，上尾班車既乘客今年都唔使落車。東風 (489)係摩根11.5元減磅後開始腳軟，高位由12.76元跌至10元左右，東風 (489)主力銷售東風標緻、東風日產，需求、價量兼備為國內中檔汽車品牌，當市場出現顯著調整，東風 (489)屬內需股核心考慮之列。吉利 (175)有高盛護航，可投機性買入及持有，吉利 (175)專營小排氣量汽車，特點係上落都夠快。

上個星期農務系股份大豐收，超大現代 (682)係6.5元最高升至8.65元，中糧油係8蚊邊升穿10元大關、中國澱粉 (3838) 今個星期都升左超過兩成。電影風雲II 票房叫座，聶風、步驚云打到風起雲湧，製作公司橙天嘉禾 (1132) 股價急升一成，票房愈好股價愈好?

您可能感興趣的放盤